Pantun : Maingat Sunnah Junjungan
Hadani Had
Pangantin halal Talah lah akad
Malam pertama taungkai rahasia
Bajajak di Pitua Nabi Muhammad
Salamat akhirat salamat dunia
Membaca salawat Hanyar bamulai
Suara mailun Nabilah bangga
Pantun nasihat kamilah ungkai
Supaya himung Nabi di syurga
Balajar kayah guru Akhlakul karimah
Supaya nyaman hidup di alam
Lamunnya andika masuk karumah
Sunnahlah jar nabi mengucap salam
Karumah bidan handak bapidara
Hilang panyakit matan di tambuni
Lamunnya hidup hibak baduhara
Kaluku Sunnah nabi kada tahirani
Mamasang baju jangan tabalik
Kaina supan luku ditawa-akan
Mun nabi Muhammad tabawa Bulik
Himung di hati kuat di badan
Ilmu fikih ambil Nang mu’tamad
Supaya ibadah rasuk lawan ruh
Bukti cinta kita lawan si Ahmad
Sabarataan gawi Nang Inya suruh
Manggawi sunnah kada sia-sia
Sabarataan digawi Tuntung sakaligus
Mesamnya kita lawan manusia
Suruhan nabi Nang liwar bagus
Batiup kahulu arahlah angin
Takirap semangat malibuk di dalam
Supaya hati lapang WAN dingin
Banyaki salawat baurai salam
Malihat si miskin kitalah bari
Barang sadikit asal kada bahalulung
Sadakahlah kita satiap hari
Jangan anggap sadikit Nang di julung
Buahlah manis buah kuini
Dimakan WAN wadi itulah jangan
Pantun nasihat sampai disini
Gasan maingat nabi junjungan
Pelaihari, 2 Oktober 2024
Tidak ada komentar:
Posting Komentar