SYAIR : HIDUP NYAMAN BARARAKATAN

SYAIR : HIDUP NYAMAN BARARAKATAN

Hadani Had

Biar haja kita ngini babida-bida

Suku, agama wan bahasa babida

Tagal kita harus rukun nang ada

Kalawan sama ciptaan nang maha ada

Hidup kita sama badadampingan

Lawan urang nang bida kayakinan

Sikap kita sudah dalam al-quran

Haruslah hidup dalam kabahagiaan

Surah Ali Imran dalam qur-an

Ayat anam ampat ditantuakan

Surah Madaniyah dalam gulungan

Manambahi kayakinan wan kaimanan

Kita sabarataan nusia disuruhakan

Manjaga diri matan manyakutukan tuhan

Kita sama-sama baisi ingkutan

Manyambah Allah nang maha Rahman

Islam ngintu agama kita

Mambawa rahmat gasan manusia

Damai wan nyaman walau babida

Lantaran baingkut lawan kitabnya

Dua ratus lima anam al-Baqarah

Tagulung dalam Surah Madaniyah

Manarangakan bukti kaharatan Allah

Sipat manusia, larangan wan parintah

Kada bakakarasan dalam agama

Lantaran nang bujur salah sudah ada

Siapa baingkut lawan agama

Salamat diri matan api naraka

Jangan sampai kita takalahi

Gagara salah dalam mangarti

Hidup nyaman mun kaya damini

Kadada lagi pangrasa harat diri

Syair diambil matan Surah Ali Imran ayat 64, wan Al-Baqarah ayat 256. Palajaran PAI samistar dua Kalas 5 Palajaran 1 Hidup Damai Dalam Kebersamaan